ДОМ иницира заедничка борба на зелените партии против загадувањето од рудниците

На годишното собрание на Европските зелени што се одржува од 24 – 26 ноември во Карлштад, Шведска, учествува и делегација од ДОМ, информираат од партијата.
Главни теми на собранието се мерките за успешна примена на договорот од Париз за климатските промени и визијата за зелена Европа, базирана на демократија, социјална правда, чисти технологии и одржлив економски развој . Целта е да се создаде општество на благосостојба и еднакви можности за слободни и креативни граѓани.
Од партијата соопштија дека на состанокот на Балканската зелена мрежа ДОМ иницирал заедничка борба против загадувањето од рудниците кои работат со опасни технологии, употребувајки цијанидни раствори и сулфурна киселина, кои трајно ги загадуваат водите и почвата. Сите присутни балкански зелени партии ја прифатиле иницијативата затоа што се сретнуваат со истите проблеми и во своите земји, информираат од ДОМ.
Делегацијата на ДОМ во Шведска ја сочинуваат пратеничките Лилјана Поповска и Маја Морачанин,како и советниците од Градот Скопје и општина Ѓорче Петров – Христа Најданов и Бојан Петровски.
Извор: Макфакс

ТВ Орбис - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Сподели